Rom 7 | ASO | STEP | Neze zuhokizo, lingine louli'mi monovo gili minavemu' nene noluvoni' nenako nemu' nene evene' laza louto' gelekele' olone' nene vetesi none' gameneukovo' nene gelekele' olosune lisa gili nilisave.

Romans 7

Paulo' Aza Vene' Vemoho' Minaa' Monovolo' Lo Molo Kilisitokisi Hilunidoti' Nene Louto' Gelekele' Ogo Minune' Monovo Nene Mo Osu' Lave Line' Gamazi

1 Neze zuhokizo, lingine louli'mi monovo gili minavemu' nene noluvoni' nenako nemu' nene evene' laza louto' gelekele' olone' nene vetesi none' gameneukovo' nene gelekele' olosune lisa gili nilisave. 2 Nemu' nene naza gamazi ma ti' lo lo molo noluve: Vene' di minani' vene' neve nene ve malo' vamoloseive lo minine' lou' gamazi ne'mo nene vanaho velesi ha mineline' gamenelokovo' nene analo' do minaa' neine'za vanaho ma heleline' nene vanahidokovo' minelive lo minine' lou' ne'mo nene kuluhize-davo haza mineleseive. 3 Ido' nemu' nene vanaho velesi ha neivo ve gohi malo' viline' nene vene' vemoho' bizivo' minaakumu' minine' lou' ma nene avuto' oga' ine' vene' ve li-dilisave. Ne'mine li-dilisaha vanaho helavosa ve gohi malo' vamilive lo minine' lou' ma'mo nene kuluhize-dine' nenako nemu' nene ve gohi malo' viline' nene a'mine lou' ma avuto' amoloseive. 4 Nemu' nene neze zuhokizo, a'mine'mine igi linginesi nene Kilisitolesi hamo' lili' igi mini maka' hilikevo gomu' vadibo ne'mine minive ado' lou' gamazi ne'mo nene gohi adido' do minamivo minikeve. Ido' ne'mine ani' nene ve gohi malo' vi gi'mizilizangumu' nene ne'mine ani' ve. Ee, O'mosola gihile di soto' ilizangumu' hilinguti' otive Izesu'ni eita nene vi gi'mizilizangumu' nene ne'mine ani' ve. 5 Laza lemeni dameni litehelo' e'meto minune' gamenela nene laza lihime monovomu' lanite' gelaa' une' monovo nene lou' ne'mo do ote-davo okode mukita gono davo a'mido' e'metunidoti' gihile've nene helaa' akalo' mine molo minune' ve. 6 Ne'mine une'za Kilisitolesi maka' hilune' ne'mo nene louli'mo adelo' do minine' nene idise kuluhize-ledavo laza a'mine litehe molo vine' lou' gamazi gizani' malo' nene gelekele' amo O'moso'mi Sikalahuli'mo lemeni dameni gosoho' do soto' o-lidido' nene gelekele' ogo gono daa' noune.

Lou' Gamazi'mo Lihime Monovo Do Soto' O-ledavosa Lihime Daa' Noune' Nemu' Paulo' Line' Gamazi

7 Nemu' nene laza nadive lolone. Lou' gamazi nene inite' goloso lihime ne'mine neive lolobe. Mo keke' ne'mine neive lamolosune'za lou' nene ma minamidiniko naza lihime monovo nene mo ningamuvodine. Ee, lou' ne'mo mumuzo' amozo lamidiniko naza mumuzo' oga' monovo nene ma ningo gelamuvodine. 8 A'mine lou' gamazi ne'mo nene aka velo do upuho' o-davo lihime monovo ne'mo nene mumuzo' oga' monovo muki' nene vauve elo lu'neu' do soto' o-nidine' ve. Ee, lou' nene ma minamidiniko lihime monovo ne'mo nene ogo molo monaa' initekisi ma amo hilive ne'mino haza minidinako nemu' nene noluve. 9 Gomu' lou' ne'mo nenita olihe amivosa naza nene ha gopo minevo' alevo' ogo ve'nesi minuvoni'za O'moso'mi lou' gamazi ogo hetelidoti' nene lihime monovo ne'mo nene hiline' gelavo lu'neu' mininguti' nene gilelo otavosa 10 naza ma nene mo hiluvoni' gelo minekuve. Ne'mine ogo mino naza giluvoni' nene O'moso'mi lou' gamazi ne'mo minevo' minevo' oloni' akalo' nene nele'mize molalosa minine'za asi helaa' akalo' nele'mize molaave lo giluvoni' ve. 11 Ido' ne'mine noluvoni' nene nemu' noluve: A'mine lou' gamazi ne'mo nene aka velo lihime nene do upuho' o-davo lihime monovo ne'mo nene go'ne izavo lou' nene avuto' okuvosa ne'mo nene nebele helave. 12 Nemu' nene O'moso'mi lou' gamazi nene mo lihime'vesi nomine' lamine' gehepeve neivo ido' gamazi hamo' hamo' a'mingu' nizani' nesi nene lihime'vesi nomine' mino mo lisihe' laminekovo' ne neive.

13 Nemu' nene naza hiluvoni' ma nene a'mine inite' lamine' gehepeve ne'mo nene nebelavosa hiluvoni' nehe. O'ove. Ne'mo nomive. Lihime monovo neve nene inite' goloso minine' nene mo soto' ogo minelingumu' nene a'mine lihime monovo ne'mo gono do a'mine inite' lamine' lou' gamazi nedunu' nene nemengu' molavo ne'mo nene lihime dosa hiluvoni' gelavo nouve. Ido' ne'mino neine' nene lou' ne'mo nene lelebizavo lihime monovo atoli'mine ogo inite' goloso gehepeve minine' nene ningeloningumu' nene ne'mino neive. 14 Ee, laza ti' lo gele none: O'moso'mi lou' gamazi neu' nene O'moso'mi Sikalahuli'mi emeni damenisi neive. Ne neiha neni' nene haza eveneliti lemeni damenisi mino lihime monovo'mi gelekele' ve ne'mine ne nouve. 15 Ido' ne'mine noluvoni' nene nemu' noluve: Naza nene olosa gelamuvoni' inite' monovo goloso nene ogo molo ogo mino naza gosele' gehepeve nebelaa' neine' inite' nene ha oga' nouve. Ne'mine oga' nouvoni' nene nanimu' nouhe nemu' nene mo gelesi amuve. 16 Ido' naza nene lou' avuto' ogo olosa gelamuvoni' inite' goloso ma oloni' nene ha oloha olosa gelamuvoni' ne'mo nene a'mine nene amaa' inite' ve lo giluvoni' nene do soto' oloseive. Ido' lou' ne'mosi nene a'mine inite' amaa' inite' ve lo neine' nenako naza giluvoni' nesi nene lou' ne'mo lido' vo milise' ogavo ne'mo naza lou' nene mo lamine' neive lo giluvoni' nene do soto' oloseive. 17 Ne'mino neine' nenako naza inite' goloso oloni' nene neni' gehepeve olovoba asi neni' lu'neu' minine' lihime monovo ne'mo nene oloseive. 18 Naza lamineto' noluve. Neniku' nene ado' nemeni dameni litehesi nouvongu' neve nene monovo lamine' ma minamive lo gele nouve. Nanitekumu' ve. Naza nene monovo lamineto' e'metelesa ha gelelesuha e'metaa' nene mo ngelo ma amolosuve. 19 Ne'mine noluvoni' nene nemu' noluve: Inite' lamine' olosa gelaa' nouvoni' ma nene mo osa'muve. Asi monovo goloso olosa ma gelesa'muvoni' ma nene ha o'mo vo minaa' nouve. 20 Ido' naza nene olosa gelamuvoni' inite' ma oloni' nene neni' gehepeve olovoba asi neni' lu'neu' minine' lihime monovo ne'mo nene oloseive.

21 Nemu' nene monovo nenita ne'mino ma neine' nene mo ningekuve: Naza nene monovo laminekovo' ogo molo minelove lo nogiluvo a'mido' nene goloso monovo neve nene nenita mo omo minaa' neive. 22 Ee, neni' lu'neu' gehepeve vomine O'moso'mi lou' gamazimu' nene lanite' gelaa' nouha 23 oko'ne mukita nene ato' monovosi minaa' neivosa nene mo ningekuve. A'mine monovo ne'mo nene lu'ne ga'neu' minine' monovo lamine' nene lovo o emo mino a'nelo' nesi nene do mino a'mine oko'nela minine' lihime monovolo' nene do gelekele' o-nedaa' neive. 24 Agae, minevo' alevo'ne lihitehe' o vive naza helaali'mi akalo' mine molani' oko'nesi mene nouvonguti' nene zaho do nu' izelive. 25 Guvetesi ve Izesu' Kilisito' asi've nene mo do nu' izaa' neive. Nemu' nene O'mosomu' tangezo' ve lo nolo-duve.

Ido' gamazi muki' mene luvongumu' nene gelo ti' lo lolosuve: Neni' nene ga'nedunu' O'moso'mi lou' gamazilo' nene gelekele' oga' nouvoni'za nemeni dameni litehe ne'mo nene lihime monovolo' do gelekele' o-nedaa' neive.